Home / Art / Àṣà Oòduà / KÁDÀRÁ Ò GBÓÒGÙN

KÁDÀRÁ Ò GBÓÒGÙN

Adáni wáyé ti dáni sáyé ná.
Káwayé máyà tó sayé dàwáàlọ.
Òréré layé kò see wò tán.
Àyàfi ká gba kádàrá lókù.
Kádàrá ò seé kọ̀ láìgbà.
Ádíá f’ẹ́ja tó f’ibú selé.
Ádíá f’ọ́pọ̀lọ́ tó f’òkè s’ebùgbé.
Ọ̀pọ̀ló f’omi s’elé, ó fèèpẹ̀ s’ebùgbé.
Àdán s’ẹyẹ tán, ó tún s’eku.
Lọ́wọ́ ọba mi àrà tí ń sisẹ́ àràmàǹdà.
Kí gbogbo ẹyẹ ó máse bínú àdán mọ́.
Kí gbogbo ẹja ó máse bínú ọ̀pọ̀lọ́ gan.
Ìpín-ò-jọ̀pín nílé ayé ń bí.
K’óníkálukú gba ti ẹ̀ lókù.
Iná ń bẹ lábẹ́ asọ kóówá.
Bí ti ń jóníkálùkù ọ̀tọ̀ọ̀tọ̀.
Iná tí ń jóni tá ò gbọdọ̀ jósí.
Iná tí ń jóni tá ò le è pa.
Iná abẹ́ asọ a máa jóni lọ́pọ̀lọ́pọ̀.
Ẹ̀dá tí ń sáré àtilà.
Kó rántí ẹni tó sáré là tí ò tọ́jọ́.
Ẹ̀dá tí ń sáré àtilu.
Kó rántí ẹni tó sáré lura rẹ̀ mọ́lẹ̀.
Ẹni ọba mi òkè bá pá lórí kó dúpé.
Lọ́jọ́ tí wèrè bá mọlé onígbàjamọ̀.
Ẹkún ń lá, tí kò leè sun ni.
Olówó ń sunkún, ẹ̀yin lẹ ò gbọ́
Ẹdìẹ ń làágùn, ẹ̀yin le ò mọ̀.
Iná tí ń jóni lábẹ́ asọ.
S’ebí lára oníkálukú ní ń bẹ.
Iná tí ń jóni tá ò leè pa.
Iná abẹ́ asọ ni wọ́n pè bẹ́ẹ̀.
Bí ẹ r’ẹ́ni tó lówó lọ́wọ́ bí alówólódù,
Ẹ má rò pó ti ń dùn bí ìlù dùn-ùn dún.
Ohun tí ń rán lábẹ́ asọ rẹ̀ ń dùn-ún dénú.
Ènìyàn le lówó lọ́wọ́ láì l’ẹ́nìkan.
Ènìyàn le lówó lọ́wọ́ láì láya ńlé.
Débi wípé ó máa bímọ gan.
Obìnrin le lówó lọ́wọ́.
Obìnrin le lẹ́wà lọ́dọ̀,
Kó tún jẹ́ opó ọ̀sán gangan.
Lọ́wọ́ ọba mi àrà tí ń sisé àràmàǹdà.
Òbìrí layé ẹ̀yin ọ̀rẹ́.
Òbìrí layé ẹ̀yin ọ̀rẹ́ ẹ̀ mi.
Ẹní lòrí ò ní fìlà.
Ẹni nì fìlà ò lórí.
Ẹni ra bàtà ò lẹ́sẹ̀.
Ẹní lẹ́sẹ̀ ò ra bàtà.
Oníkálukú abi ti ẹ lára.
Iná ń jó ògiri ò sá.
Òjò ń rọ̀ òrùlé téwọ́.
Sebí wọ́n gba kádàrá ni.
Ká gba kádàrá,
Káma jírẹ̀ẹ́bẹ̀,
Sọ́ẉọ́ ọba mi àrà tí ń sisẹ́ àràmàǹdà.
Kámá torí gbígbó ká pajá.
Kámá torí kíkàn ká pàgbò.
Kámá torí àwíjàre kítọ́ ó tán lẹ́nu.
Ẹni bá torí p’élé ayé burú,
Tó wá gbòrun alákeji lọ.
Ẹ báni bi wọ́n pé kin ni wọ́n fẹ́ bá pàdé níbẹ̀ẹ̀ẹ̀ẹ̀ẹ̀ẹ̀ẹ̀.

Send Money To Nigeria Free

About Awoyemi Bamimore

x

Check Also

A list of prepared Yoruba numbers (Onka ede Yoruba 1 – 10,000)

A list of prepared Yoruba numbers (Onka ede Yoruba 1 – 10,000)

To understand the Yoruba language, common vocabulary is among the important sections. Common Vocabulary contains common words that individuals can use within daily life. Numbers are one section of common words found in daily life. If you’re interested to master Yoruba numbers, this post can help you to master all numbers in the Yoruba language using their pronunciation in English. Yoruba numbers are found in day-to-day life, so it’s essential to master Yoruba numbers. The below table provides the translation ...